طَرطَشةَ شعبية في نقد الثورة المصرية

بدون مقدمات هذه أمثلة على تلك الطرطشة

...................................................................................

- تبقى ماشي في مظاهرة ولا راكب في مواصلات و تلاقي راجل او ست فوق الستين ومش عاجبهم الثورة و يقولك لما انتم بتتكلموا و عاملين ثورجية كنتم ساكتين ليه التلاتين سنة اللي فاتوا.

يا حاج ويا تيتا أنا عندي ٢٦ سنة بس !!!!!!!

...............................................................

- تلاقي سواق تاكسي ولا ميكروباص بيقول منها لله الثورة خربت البلد و وقفت حالنا !!!
و هو دلوقتي مرحوم من المصالحات " رشوة المرور المقنعة " و من الحضانة اللي كان بيدفع عن اليوم ١٠٠٠ جنيه فيها و كمان بقى بيضاعف الاجرة.

........................................................................

-تلاقي شاب ثلاثيني غير متزوج و مش قادر ماديا و دخله ضعيف و بيلعن ابو الثورة!!! تقوله الثورة دي قامت عشان العدالة الاجتماعية و فلان مثلا بيقبض مليون ونص في الشهر .. يقولك وانت مالك هو بياخدهم من جيبك !!!! 

اه بياخدهم من جيبي و من جيبك و من جيوبنا كلنا.

.......................................................................

- تلاقي صاحب محل بقالة بيقول لحد واقف معاه كل شوية مظاهرة و يوقفوا حالنا !!!
و هو لسه بايع اكل و شرب للمتظاهرين في نص ساعة اكتر من اللي بيبيعه طول الاسبوع.

........................................................................

- تلاقي واحد بيقولك الفيديوهات دي فوتوشوب .. تقوله الفوتوشوب برنامج صور مش فيديوهات يقولك لا بتاع فيديوهات !!!! 

وانت شغال ع الفوتوشوب من ٩ سنين و هو عمره ما سمع عنه الا بعد الثورة و من عمرو مصطفى..

................................................................................

- تلاقي واحد كنباوي بيقولك الثورة عملتلنا إيه يعني ما الحال زي ما هوّ و الفساد زي ما هوّ !!  

هو انت عايز تقعد في بيتكم تلعن في الثورة و تأيد أعدائها و تساهم في وأدها و منتظرها في الاخر تغيرلك الحياة.

...................................................................................

- الجملة الشهيرة لو المجلس مشي مين حايحكم !!!! .

يعني مثلا إحنا ٨٨ مليون راس غنم ولا مصر عدمت نوابغها و اساتذتها و مفكريها .

و نسيتوا انكم كنتم بترددوا نفس الكلمة على المخلوع "ربنا يورينا فيه يوم" وأول ما خلع نزلتم احتفلتم في الشارع !!!

طب مثلا لو مات طقم المجلس كله " والإعمار بيد الله و مفيش حاجة بعيدة عليه عز وجل .. وقولوا أميـــــــــــــــــن :) " حانعمل إيه حانجيب جيمي من طرة يحكمنا مثلا.

 

...................................................................................

- تلاقي عسكري ولا أمين شرطة ولا حتى ضابط بيلعن في ابو الثورة ونفسه يبيد الثوار عن بكرة ابيهم " ممكن تقول حقه عشان اللي اتعمل فيهم يوم 28 يناير :)) " اقولك لأ حتى اللي في مصالح خدمية كمان !!!

مع ان رواتبهم تضاعفت و ساعات عملهم قلت والغيت المحاكمات العسكرية للافراد وده كله بعد الثورة :))
وكمان جايبين لهم عربيات اخر موديل و كمان بي ام دبليو اكس 3 و البلد بتفلس :)).

..................................................................................

طبعا الامثلة كتيرررررررررر بس كفاية دول مؤقتا :)