Prof Photo

Prof Photo

اول ما تدخل اذكر الله

"الَّذِينَ آَمَنُوا وَتَطْمَئِنُّ قُلُوبُهُمْ بِذِكْرِ اللَّهِ أَلَا بِذِكْرِ اللَّهِ تَطْمَئِنُّ الْقُلُوبُ"

الأربعاء، 20 يونيو 2012

يوم في حياة شاب كنبة " اليوم الأول هاي كلاس "


السلام عليكم ورحمة الله وبركاته

من زمان مكتبتش حاجة ومنهم لله اللي كانوا السبب مجلس الهامانات " جمع هامان قائد جيوش فرعون "
المهم بمناسبة حملة التدوين قررت اكتب و عشان ميكونش اول القصيدة كفر حاحاول ابتدي اول تدوينة بسيناريو خفيف

و الأن مع السيناريو :)

........................................................

يفتح الباب بعصبية ثم يغلقه بعنف بعد ان يدخل الى منزلهم الراقي في احد الابراج الفاخرة

الشاب : هاي مامي .. "و بنبرة متكبرة " انا خلاص قرفت من البلد دي ,بفكر ريلي "Really" اسافر أمريكا عند اونكل مراد لحد ما العيال دي تتعب وتقعد في بيوتها.

الام : هدي اعصابك يا كتكوتي وقولي مالك بس و عيال مين دول!!!
 
الشاب : العيال اللي اسمهم ثوار دول , عاملين مظاهرة وقافلين الشارع .. تخيلي يا مامي انا ماشي من النادي من ساعة تقريبا و السكة زحمة موت موت.......
ابسلوتي "Absolutely" العيال دي عملا و متأجرين زي ما دكتور عكاشة بيقول عليهم.

الأم : طبعا يا حبيبي وإلا ايه يعني اللي يخليهم يقفوا في عز المطر والهوا في الشتا اللي فات و دلوقتي في عز الحر ده , أكيد قطر واسرائيل و أمريكا دافعين لهم كويس .
 
الشاب : أنا حكلم الشلة وننزل نقعد ع الكافييه.

الام : اوكيه يا روح قلب مامي , الكريديت بتاعك فيه فلوس ولا تاخد الكريدت بتاعي !!
 
يلتقط الشاب الكنبة موبايله الايفون فور إس ويتصل بصديقه وائل 

الشاب : هاللو وائل هاوريو مان.

وائل : الحمد لله ايه اخبارك انت يا ميمي " وصوت دوشة شديد في الخلفية ".

الشاب : ايام فاين "I'm fine" ايه الدوشة دي انت في بارتي يا خاين ومتقوليش؟

وائل : بارتي ايه بس يا ميمي ده صوت الهتافات في المظاهرة !!

الشاب : اه منهم لله العيال دي خربوا البلد واعصابي تعبت منهم جدا , طب عايزين نتقابل في الكافيه اول ما تعرف تعدي من زحمة المظاهرة دي كلمني.

وائل بتعجب : خربوا البلد!!!! البلد طول عمرها خربانة يا ميمي احنا اللي كنا مش حاسين بحاجة .. أنا ماشي في المظاهرة وياريت تيجي تمشي معانا.

الشاب : انت بتهزر يا مان اكيد . مظاهرة ايه الل امش فها . دي عيال متأجرة عشان تخرب البلد عان اسرائيل تحتلنا والاسلاميين يمسكوا البلد ويقفلوا الديسكوهات و النوديست بيتشز.

وائل:" بعصبية" ما تفوقوا ولا احنا عشان مولودين في بقنا معلقة دهب منحسش ببلدنا وبالناس , بطلوا فرجة على الزفت دكر العكش ده اللي سمم افكاركم ...
محمود صاحبنا اتقتل وهو بيعالج الشباب في التحرير و بيهتف حرييييييييييييييييية ... كليييييييييييييييك " صوت غلق الخط "

الشاب : هو قفل في وشي .. لالالالا اكيد الشبكة قطعت خلاص مش مهم وائل , اكلم سوزي وبقيت الشلة.

على الطرف الاخر من الاتصال هاتف بلاك بيري تورش يرن وتمسكه فتاة في العشرين من عمرها وهي تقف أمام المرآة تضع الدبوس في طرحتها الصغيرة

سوزان : ألو سلام عليكم
 
الشاب : هاي سوزي هاو ار يو
 
سوزان " وهي تنفث دخان غضبها " : ازيك يا محمد .. خير " هفففف "

الشاب : محمد!!! ايه يا سوزي ليه مقولتليش ميمي .

سوزان : اولا انا مش سوزي انا سوزان , ثانيا انا لسه قافلة مع وائل ونازلة رايحلهم المظاهرة ومش حانسكت على حق اصحابنا وخليك انت في البيت جنب مامي.

الشاب : كل ده عشان ايه يعني هو انتم محتاجين تنزلوا مظاهرات ولا عشان محمود مات!!! .. أولا ده كان ولد معقد كل حياته كتب و رياضة و سياسة, ده حتى ستاربكس مكنش بيرضى يقعد عليها لإن صاحبها يهودي وربع ارباحها بيتبرع بيها للجيش الاسرائيلي !! واحنا مالنا ان شالله حتى يتبرع بيها كلها .. وبعدين هو ايه اللي وداه هناك وهو عارف ان ضرب النار شغال !!!!!!!!

سوزان : أه محتاجين .. محتاجين حرية وكرامة وعدالة و أه عشان محمود هو راح هناك عشان راجل مش ......... , راح عشان يساعد الجرحى اللي الأمن المركزي والشرطة العسكرية ضربوهم بوحشية بخرطوش ورصاص حي ...... الشهيد محمود كان راجل فاهم يعني ايه راجل ولا صح انت متعرفش معنى الكلمة دي يا ميمي هههههه .. يلا امشي عشان عايزة انزل ... كليييييييك

ماشي ماشي حتى انتي يا سوزي .. طب انا حنزل لوحدي على ستاربكس 
حاقعد بالعند فيكم .. هيييه بس

وينزل ميمي ويجلس على ستاربكس و يتعرف على شلة جديدة " ممن هم على شاكلته" و يتفقوا على الذهاب الى انتخابات الرئاسة لينتخبوا " الفشيق " بالعند في العيال الثوار دول وهم يقولون " حانحط صوابعنا في دم الشهداء بتوعهم زي ما بيقولوا " هههههههههههههه

.......................................

الى اللقاء مع اليوم التاني داون كلاس :))

هناك 8 تعليقات:

  1. حلو اوى بجد سيناريو اكثر من رائع بس الواد ريلي^_^ ده لازم يتفجر مستفز أوى هههه

    ردحذف
    الردود
    1. فعلا لازم يتفجر هو وكل كنبة شبهه
      وشكرا ع الكومنت

      حذف
  2. حلو سيناريو اليوم الاول وفي انتظار سيناريو اليوم التاني

    ردحذف
    الردود
    1. شكرا
      سيكون جاهز للنشر بعد منتصف الليل بإذن الله

      حذف
  3. تسلم ياباشا

    وياما هنشوف من الأشكال دي

    :)

    تسلم على اسلوبك الرائع

    ردحذف

مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ