Prof Photo

Prof Photo

اول ما تدخل اذكر الله

"الَّذِينَ آَمَنُوا وَتَطْمَئِنُّ قُلُوبُهُمْ بِذِكْرِ اللَّهِ أَلَا بِذِكْرِ اللَّهِ تَطْمَئِنُّ الْقُلُوبُ"

الخميس، 21 يونيو 2012

يوم في حياة شاب كنبة " اليوم الثاني داون كلاس "

السلام عليكم ورحمة الله وبركاته

بعدما استعرضنا يوم من حياة شاب كنبة هاي كلاس

يوم في حياة شاب كنبة " اليوم الأول هاي كلاس "

نتكلم دلوقتي على كنبة على النقيض في المستوى المادي والاجتماعي لكن يتمتع بنفس العقلية او اللا عقلية

.................................................

في بيت متهالك
في عشوائية خلف البرج الذي يقطنه ميمي والذي يقع في حي راقي ولا يفصلهما عن بعض سوى جدران من الطوب والاسمنت

يدخل الاسطى حموكشة " شاب أعزب في اواخر العشرينات " الشقة غاضبا ويقول لوالدته : حضريلنا الاكل بسرعة ياما عشان نلحق نروح ننتخب .
الام : طب قول السلام عليكو الاول .. "و بابتسامة بسيطة" حاضر يبني الاكل ع النار بس بعد ما تاكل تشوفلنا توك توك عشان تاخدني معاك ولا انت جاي بالميكروباص !!!!!

حموكشة : لا ياما الميكروباظ سلمته للسواق التاني .. وبعدين ايه ياما ده انتي حاتروحي تنتخبي ... ها ها ها ها

الأم : طبعا يا ابني . لازم ننتخب رئيسنا عشان يرجعلنا حقوق الولاد اللي زي الورد اللي ضحوا بنفسهم عشان الثورة .. دا انا كل ما اشوف صورة حد من شهداء يناير اقعد اعيط وادعي على الريس ربنا ينتقم منه هو و ولاده والولية الأرشانة مراته !!

حموكشة : تعيطي على ايه ياما , عيطي علينا وعلى حالنا وسيبك منهم دول عيال فاضية و بيقبضوا باليورو ياما .. ويا ترى بقى حاتنتخبي مين .. طبعا الراجل المحترم الفريق احما شفيق , هو ده اللي حايعرف يظبطها صح.

الأم : يظبط ايه ياواد دا حايخربها اكتر ويرجعلنا حسني مبارك تاني ربنا ينتقم منه ولا نسيت ابوك اللي مات من القهرة لما طلعوه معاش مبكرة وباعوا الشركة برخص التراب , يا ابني دا انا كنت لسه بتفرج على فيديو الشباب مشغلينه في الشارع ع الشاشة الكبيرة وهو بيقول ان مبارك مثله الاعلى وانه حايرجع النظام زي الاول وكمان هو كان رئيس الوزرا في موقعة الجمل وساب الشباب يتقتلوا وقال حاوديلهم بونبوني .
أنا يبني حنتخب الراجل ابو وش سمح اللي اسمه ابوالفتوح حتى اسمه كده يشرح القلب وربنا يفتح علينا بيه , دا حتى حايعمل معاش للستات اللي زيي و اقدر اعلم اخواتك التلاتة احسن علام.

حموكشة : ابوالفتوح دا كان اخوان ياما , دا حيخلي الستات تتنقب كلها وحايضربونا في الشوارع بالكرابيج , انا حنتخب الاستاذ شفيق بالعند في العيال اللي خربوا البلد دول ولازم تنتخبيه زيي.

الام : هو استاذ ولا فريق يبني ولا يكونش منتخب .. ههههههههههههه

طب لو مش عاجبك ابوالفتوح عشان اسلامي انتخب حمدين صباحي اهو مناضل وثوري برضه, و بعدين يبني العيال دول هما اللي عايزين يرجعولنا حقوقنا وكرامتنا ولا نسيت قبل الثورة امين الشرطة كان بيعمل فيك ايه .. مش كان بياخد منك ربع الايراد و لما مرضيتش تديله في يوم سلط عليك الظابط خدك حضّانة ودفعت الف جنيه وصاحب العربية بقى بيخصمهم من حصتك في الايراد, شوف دلوقتي بقى لاغرامات ولا فردة من امناء الشرطة و كمان بتقطعوا المسافة واجرتكم بقيت الدوبل . مع ان ضميري مش مستريح للحكاية دي وحاسة ان ربنا مش بيباركلنا بسببها.

حموكشة : اقعدي ياما والله ما انتي منتخبة حد و حطيلي الطفح خليني انزل انتخب الفريق بالعند فيهم ويسلمولي ع التحرير بتاعهم .. ها ها ها


............................................................................

فيه عينة تالتة كان نفسي احطها بس عشان ميحصلناش ملل من التكرار :))

وهي عينة من الطبقة البرجوازية وموظفي الحكومة والشركات العامة اللي مرتباتهم زادت بسبب الثورة و برضه بيلعنوها انها وقفت عجلة الانتاج مع انهم اكتر ناس عارفين انها واقفة منذ زمن
.

يارب تعجبكم وأكون قدرت أوصل الفكرة

ممكن تستخلصوا سيناريوهات اخرى من التدوينة دي

طَرطَشةَ شعبية في نقد الثورة المصرية

هناك 14 تعليقًا:

  1. اسلوبك جميل أوي يا عثمان



    مستنين الباقي يا باشا :)

    ردحذف
    الردود
    1. شكرااا يا احمد
      مدونتي نورت :)

      حذف
  2. راااااائع يا عثمان بجد
    وصلتها بشكل رائع،، بسيط وواقعي،،
    هاروح اشوف ميمي،، عشان ما لحقتهوش :)

    ردحذف
    الردود
    1. ودي تيجي ايه جنب ابداعاتك

      وبرضه المدونة نورت :)

      حذف
  3. حلو جدا وطنط دي كمان حلوة جدا .. بس كانت محتاجه تقوم تدي ابنها ده قلمين على شبشبين يمكن يفوق :)

    ردحذف
    الردود
    1. طنط دي انا شفتها كتير في فيديو ع اليوتيوب و تعليق لناشط سياسي ع الفيس و شفتها في الشارع ..
      لكن حموكشة ده غالبا بيتعاطى و بيقل ادبه عليها وهي مش بتقدر عليه
      ومع ذلك هو محتاج شبشبين و قفايين و قلمين وحاجات كتير :))
      وشكرا لتعليقك الطيب

      حذف
  4. اسلوب رائع .. عاميه جزله وبسيطه

    معبره وسينيمائيه ف نفس الوقت .. مدعاة للتخيل

    تحياتي .. دمت مبدعاً

    ردحذف
  5. حلوة وبسيطة ..
    وطبعاً ده نمط سائد للأسف

    ردحذف
    الردود
    1. فعلا هو نمط ما يسمى بحزب الكنبة
      يحكمون بالاهواء وباللي يريح دماغهم

      حذف
  6. أسلوب ردي مميز وفكرة مضمونها عميق وجميل .. أرجوا المشاركة في جمعة التاريخ الأود يوم 20 يوليو القادم تحياتي

    ردحذف

مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ